MNYF-in Aizawlah meihawl an sem

MNF party thalaite chuan Mizoramah eirawngbawlna gas a harsat avangin nimin khan Aizawl khawpuiah meihawl an sem a, an meihawl sem chu 'Hawla gas' tiin a hming an vuah. Congress a sorkar apiangin gas a harsa thin niin an sawi. Hetih lai hian, FCS&CA Directorate atanga gas emergency quota a sem thin chu vawiin atangin tihtawp a ni dawn.

MNYF-in meihawl an semna hi Millennium Centre tualah an tan a, Millennium Centre atangin a huhoa kawngzawh pahin kawngpui dunga meihawl an sem a, thu chi hrang hrang hmangin an aurual nghal. Kawng an zawh zawhah Supply Directorate-a gas emergency guota diltute hnenah meihawl an sem leh bawk.

Meihawl an sem hmaa Millennium Centre tuala inkhawm tâwitê neihah MNYF President, PC Laltlansanga chuan, Gas hatsatna hi sorkar mawh a ni a, mipui sorkar hian mipuite harsatna hi kawng tinrengah a sukiang tur a ni," a ti a; gas harsat chhanah sorkar hotute chhuanlam hrang hrang an hmang zel a, gas a ziaawm an beisei hun a thlenin harsatna a ziaawm thei chuang lo tih sawiin, an thiltih chu sorkarin harh phah nan hmang se an duh tak zet thu a sawi.

MNF thalaite chuan Congress sorkar kum khat hnu, 2009 tàwp lam atangin gas harsatna intan nia sawiin, "Gas harsatna hi sorkar hotute, a bikin Chief Minister leh Supply Minister te thatchhiat vang liau liau a nih bakah, Mizo mipuite hmakhua an ngaih loh luat vang a ni," an ti a; sorkar hotute chu gas harsatna chhan hrang hrang an sawiah mipuite bumah an puh.

MNYF chuan, Assembly Budget Session-ah Supply Minister-in, 'Gas harsat chhanah sorkarin mawh a phur lo, mipuiin IOC in nawr a tul,' tia a sawi chu zahthlak an tih thu leh, CM pawhin Thenzawla Vantawng Group YMA Conference-ah, 'Eirawngbawlna gas tam leh tlemah sorkarin pakhatmah mawh a phur lo,' tiin tham lo takin a sawi niin an tarlang a; "State dangte pawh gas an harsa tiin Mizo mipuite dâwt min hrilh a, state danga Mizo awmte'n gas a harsat loh thu an sawi vek," an ti.

MNF thalaite chuan, IOC hotute Mizorama ko chho a, gas harsat chhan dâwt hmanga sawifiahtirah sorkar hotute an puh a, "Gas harsat chhan an sawite dâwt a nihzia finfiah zel a ni," an ti a; February thla tawp lamah a ziaawm ang tih te, June 15 hnu lamah a ziaawm ang tihte chu dâwt a nihzia mipuiin an hre chho zel niin an sawi.

MNF thalaite hian kawngzawh pahin meihawl an sem a, an aurual bawk a; 'Eng nge kan duh - Gas' tih te, 'Hawla hming pum eng nge - Meiháwla' tihtein an aurual a ni.

Hetih lai hian, sorkar chuan thuchhuah chuan, tunlaiin Mizoram mipuite'n eirawngbawlna gas-ah harsatna an tawh mek avangin vawiin atang hian Supply department atanga emergency quota pek chhuah thin chu tihtawp a nih dawn thu a tarlang.

Sorkar thuchhuah tarlan danin, Mizoramin gas a hmuh angte mipuiah tam zawk leh rualkhai zawka sem a nih theih nan vawiin atang hian thu leh awm hma chuan FCS&CA Directorate atanga emergency quota reserve dah thin chu tihtawp a ni dawn a; gas distributor-te'n LPG truck phur khata showroom reserve tur bûr 21 dah thin pawh bûr 10-ah tihtlem a ni a, showroom reserve bûr 10 bak chu mipuiah an sem zel tur a ni.

Source : Vanglaini